Gwamnatin Gombe ta ce tana kashe kimanin Naira miliyan 150 a duk wata domin tabbatar da samar da tsaftataccen ruwan sha ga al’ummar jihar.
Gwamna Muhammad Inuwa Yahaya ne ya bayyana hakan yayin da yake bayani game da ƙoƙarin da gwamnatinsa ke yi wajen inganta harkar samar da ruwa a birane da karkara.
Ya ce kuɗaɗen na tafiya ne wajen gyara da kula da muhimman kayan aikin ruwa, ciki har da bututan ruwa da suka lalace da kuma na’urorin tace ruwa, domin tabbatar da ci gaba da samar da ruwa mai tsafta.
A cewarsa, gwamnatin jihar ta ɗauki samar da ruwan sha a matsayin ɗaya daga cikin manyan abubuwa da take bai wa fifiko domin inganta lafiyar jama’a da walwalar al’umma.
Gwamnan ya amince cewa har yanzu ana fuskantar ƙalubale wajen biyan bukatar ruwa saboda ƙaruwar jama’a da faɗaɗa birane da kauyuka, amma ya tabbatar da cewa gwamnati na ci gaba da faɗaɗa ayyukan ruwa domin ƙara yawan samarwa da inganta ayyukan.
Haka kuma, gwamnatin ta ce za ta ci gaba da zuba jari a ɓangaren ruwa domin tabbatar da ɗorewar samar da tsaftataccen ruwan sha a faɗin jihar.
Ta kuma bukaci al’umma da su taimaka wajen kare kayayyakin ruwa daga lalacewa tare da kai rahoton duk wata matsala ga hukumomin da suka dace
