Babban Bankin Najeriya, wato Central Bank of Nigeria, ya bullo da sabuwar doka domin ƙarfafa tsaron kuɗin jama’a.
Daga ranar 1 ga Mayu, 2026, za a takaita yadda ake canza lambar waya da ke haɗe da BVN, tare da ƙara sa ido idan an canza waya da ake amfani da ita wajen banki.
Haka kuma, za a iya dakatar da BVN na ɗan lokaci idan an zargi wata damfara, yayin da aka sanya shekaru 18 a matsayin mafi ƙarancin yin rajistar BVN.
Ana sa ran wannan mataki zai taimaka wajen hana shiga asusu ba tare da izini ba, musamman idan an canza na’urar da ake amfani da ita. Haka kuma, dokar za ta ƙara tsaurara sa ido kan mu’amalolin da ake zargi.
An ce matakan na da nufin rage damfara da kare kuɗin ‘yan Najeriya.
