- Hukumar Jin Daɗin Alhazai ta Jihar Jigawa ta yi alkawarin cikakken haɗin gwiwa da goyon baya ga sabon Amirul Hajj na jihar, Mai Martaba Sarkin Dutse, Alhaji Mohammed Hameem Nuhu Sunusi, domin nasarar aikin Hajjin shekarar 2026.
Darakta Janar na hukumar, Alhaji Ahmad Umar Labbo, ne ya bayyana hakan yayin wani taron manema labarai da ya gudanar a ofishinsa da ke Dutse, babban birnin Jihar Jigawa.
Alhaji Labbo ya bayyana nadin Sarkin Dutse a matsayin abin da ya dace ƙwarai, la’akari da jajircewarsa wajen harkokin addini da kuma rawar da yake takawa a matsayin jagoran al’umma a jihar. Ya ce sabuwar rawar da aka ɗora masa ta Amirul Hajj ta zo a kan mutum mai cancanta da gogewa.
Ya ƙara da cewa sabon Amirul Hajj yana da cikakken ilimin addini da kuma basirar shugabanci da ake buƙata domin jagorantar alhazai yadda ya kamata yayin aikin Hajji. A cewarsa, hukumar za ta yi aiki kafada da kafada da shi, tare da neman shawarwari da jagorancinsa domin tabbatar da nasarar aikin Hajjin.
“Hukumar Jin Daɗin Alhazai za ta ba da dukkanin goyon bayan da ya dace, tare da yin aiki tare da Mai Martaba domin ganin an gudanar da Hajjin 2026 cikin nasara, tsari da kwanciyar hankali,” in ji Alhaji Labbo.
Darakta Janar ɗin ya taya sabon Amirul Hajj murna bisa wannan muhimmin nadin, inda ya tabbatar da cewa ma’aikata da shugabannin hukumar za su ba da cikakken haɗin kai da biyayya wajen aiwatar da ayyukansu.
Haka kuma, Alhaji Ahmad Umar Labbo ya yaba wa Gwamnan Jihar Jigawa, Malam Umar Namadi, bisa wannan zaɓi da ya bayyana a matsayin mai kyau da hangen nesa. Ya ce zaɓin Sarkin Dutse a matsayin Amirul Hajj ya nuna yadda gwamnati ke da niyyar tabbatar da kyakkyawan shugabanci da kula da jin daɗin alhazan jihar.
Ya jaddada cewa sabon Amirul Hajj ya cancanta matuƙa a matsayinsa na jagoran addini da na al’umma, wanda hakan zai taimaka wajen samun nasarar Hajjin 2026.
An sanya hannu a sanarwar ga manema labarai daga Jami’in Hulɗa da Jama’a na Hukumar Jin Daɗin Alhazai ta Jihar Jigawa, Habibu Yusuf Babura, ANIPR.
