Jami’an yan sandan birnin tarayya Abuja, tare da hadin gwiwar kungiyar masu sufurin motocin haya ( NURTW) sun samu nasarar kama Alburusai 488 da aka boye su a cikin jarkar Manja.
Mukaddashin kwamishinan yan sandan birnin tarayya Abuja, mai kula da aiyuka na musamman, DCP Ishaku Sharu, ne ya tabbatar da hakan a lokacin da yake holen wanda ake zargin a ranar litinin.
DCP Ishaku, ya ce an kama shi ne a tashar mota, dauke da harsasai 488 na bindiga kirar AK47 da aka boye a cikin Jarkar Manja.
- NIDCOM Ta Ceto Yan Nijeriya 956 Daga Gidan Yarin Libiya
- Kotu Ta Yankewa Ummin Mama Hukunci Saboda Yada Badala A Tiktok
Wanda ake zargin ya shaida wa jami’an yan sandan cewa ya karbo makaman a wajen wani mutum dake jihar Nasarawa, don kaiwa wani mai suna Yakubu Kachalla mazaunin Huntuwa ta jihar Katsina, bayan ya biyashi naira dubu 100,000.
Rundunar yan sandan ta ce wanda ake tuhumar yana bata hadin kai a ciga da tambayoyin da ake yi masa kuma da Zarar an kammala za a gurfanar dashi a gaban kotu.
