Daga: Safiyanu Haruna Kutama
Kotun Majistare da ke Jos, babban birnin Jihar Filato, ta yanke wa wani matashi dan shekaru 22, hukuncin ɗaurin shekara guda a gidan yari bisa samunsa da laifin satar keke da wayar hannu.
Mai shari’a Shawomi Bokkos ce ta yanke hukuncin a ranar Litinin, inda ta bayar da zabin biyan tara ta naira 30,000 wanda zai sauya hukuncin zuwa daurin wata shida kacal.
Haka kuma, kotun ta umurci Auwal da ya biya diyyar naira 150,000 ga wanda aka yi wa sata, Abubakar Lawal. Idan ya gaza biyan wannan kudin, zai ƙara fuskantar wata shida a gidan yari.
- Kotun Kolin Nijeriya Ta Yanke Hukunci Kan Dokar Yancin Samun Bayanai FOIA 2011.
- Gwaji Ya Tabbatar Ma’aikatan Asibitin AKTH Sama Da 20 Basa Dauke Da Zazzabin Lassa
Lamarin ya faru ne a ranar 8 ga Maris a unguwar Angwan Rogo, inda rahotanni suka nuna cewa Auwal ya sace keke da waya daga hannun Lawal. Bayan kai rahoton ga ‘yan sanda, an fara bincike wanda ya tabbatar da Auwal ne ya aikata laifin. Daga bisani, an gano keken, kuma aka mayar da shi ga mamallakinsa.
A yayin da ake gabatar da shari’a, Auwal ya amsa laifinsa ba tare da gardama ba, abin da ya taimaka wajen hanzarta yanke hukunci.
Mai shari’a Bokkos ta bayyana cewa hukuncin na da nufin zama izina ga matasa da sauran ‘yan kasa masu niyyar aikata laifuka makamantan haka. Ta kuma jaddada muhimmancin gyara hali da gujewa aikata laifuka a nan gaba.
Masana harkar shari’a sun yaba da yadda aka gudanar da shari’ar cikin sauri da adalci, suna mai cewa hakan zai ƙarfafa gwiwar jama’a wajen bada haɗin kai don yaƙi da aikata laifi.
Rahoton ya nuna cewa al’ummomin yankin da masu ruwa da tsaki na ganin wannan hukunci a matsayin mataki mai amfani wajen rage yawan laifuka, musamman a garuruwan da ke fuskantar barazanar satar kaya da rashin tsaro.
Kotun ta kuma ja kunnen Auwal da ya dauki wannan hukunci a matsayin darasi, tare da gyara halayensa don gujewa irin wannan matsala a gaba.
An kuma bukaci jama’a da su ci gaba da ba da hadin kai ga jami’an tsaro wajen tabbatar da zaman lafiya da kare dukiyoyin al’umma a yankunan su.
