Gwamnan Jihar Borno kuma Shugaban ƙungiyar Gwamnonin Arewa maso Gabas, Farfesa Babagana Umara Zulum ya karɓi baƙuncin sauran Gwamnonin yankin guda biyar don taron ƙungiyar karo na 13 a Maiduguri babban birnin Jihar Borno.
Gwamnonin da suka ziyarci wurin taron sun haɗa da: Ahmadu Umaru Fintiri na Adamawa, Sanata Bala Abdulƙadir Mohammed na Bauchi, Muhammadu Inuwa Yahaya na Gombe, Dakta Agbu Kefas na Taraba da Mai Mala Buni na Yobe da sauran manyan baƙi.
“A madadin gwamnati da mutanen Jihar Borno, ina maraba da ’yan uwana gwamnonin yankin da kuma manyan baƙinmu zuwa Maiduguri don taron ƙungiyar Gwamnonin Arewa maso Gabas karo na 13,” in ji Zulum.
Taron na kwanaki biyu ya fara ne daga yau Juma’a, 2 ga Oktoba, kuma zai ƙare a ranar Asabar, 3 ga Oktoba, 2026, a babban zauren taro na gidan gwamnatin jihar da ke Maiduguri.
Ana sa ran gwamnonin za su tattauna batutuwa da dama da suka shafi yankin da suka haɗa da: ƙarfafa shugabanci nagari, haɓaka zaman lafiya da kwanciyar hankali, inganta tsaro da inganta walwalar tattalin arziki na al’ummar Arewa maso Gabas.
Taron gwamnonin Arewa maso Gabas wani dandali ne na haɗin gwiwa tsakanin yankunan da nufin aiwatar da manufofi na haɗin gwiwa da kuma ci gaba mai kyau a faɗin jihohin Adamawa da Bauchi da Borno da Gombe, Taraba da Yobe.