Kamfanin Mai na Kasa (NNPCL) ya ce ya tafka babbar asara inda ribar da ya ci ta Naira biliyan 905 a watan Yuni ta ragu zuwa Naira biliyan 185 a watan Yulin da ya gabata.
Hakan dai na. nufin ribar kamfanin ta fadi da kimanin kaso 79.6 cikin 100.
Kamfanin, a cikin rahotonsa na wata-wata da ya fitar ranar Alhamis, ya ce ya yi jimillar cinikin Naira tiriliyan 4.41 a watan Yuli, sabanin na Naira tiriliyan 4.57 da ya yi a watan da ya gabace shi.
- Nijeriya Ta Kori Yan Kasashen Waje 102 Bisa Laifin Damfara Ta Intanet
- Ya Kamata Kowane Dan Najeriya Ya Koyi Dabarar Kare Kai – Musa
NNPCL ya kuma ce ribar da ya samu a watan Yuni ita ce biliyan 905, ta watan Mayu kuma tiriliyan 1.05, yayin da a watan Afrilu kuma ya ci ribar biliyan 962.
Alkaluman dai sun nuna ainihin faduwa a kudaden shigar kamfanin, duk kuwa da cewa adadin danyen man da kasar ke haka ya karu daga ganga miliyan 1.68 a kullum zuwa ganga miliyan 1.7.