Rundunar sojin Nijeriya ta yi bikin ƙaddamar jiragen yaƙi marasa matuƙa da aka ce an ƙera a kasar a karon farko kuma mafi girma a nahiyar Afirka baki ɗaya.
Kafar yaɗa labarai ta TRT Africa ta ce an ƙera jiragen ne tare da haɗin gwiwar kamfanin Briech USA na Amurka da ke da ofis a Abuja.
A yayin bikin kaddamar da jirgin da aka yi a hedikwatar ta Briech UAS da ke Abuja a ranar Laraba, Babban Hafsan Hafsoshin Tsaro Najeriya, Janar Christopher Musa ya bayyana shirin a matsayin wani muhimmin mataki a tafiyar Najieriya wajen dogaro da kai a fasahar tsaro da inganta tsaro.
- An Hana Sanata Natasha Da Takwaranta Akpabio Ganawa Da ‘Yan Jarida
- Gwamnatin Kano Ta Faɗi Ranar Komawa Makaranta
Janar Christopher Musa ya bayyana jiragen a matsayin waɗanda za su kawo sauyi wajen tunkarar barazanar matsalolin tsaro a Najeriya.
Ya jaddada muhimmacin samar da hanyoyin tsaro na soji a cikin gida, da kuma ƙalubale a siyasar duniya wajen samar da kayyakin tsaro.
‘‘Jiragen za su taka muhimmiyar rawa wajen haɓaka ayyukan sojojinmu, musamman a duniyar da samar da kayyakin aikin soja na zamani ke cike da ƙalubale saboda siyasar duniya.’’
“Idan ba ku samar da abin da kuke buƙata ba, za ku kasance a ƙarƙashin wasu, ko da kuna da albarkatun kuɗi don samun su,” in ji shi.
Janar C Musa ya ƙara da cewa jiragen za su taimaka wa Najeriya wajen daukar matakan gaggawa don fuskantar kalubalen tsaro, tare da rage dogaro da kayayyakin ƙasashen ƙetare.