Rundunar yan sandan sandan jihar Kano, ta gudanar da taron tattaunawa da masu ruwa da tsaki na jam’iyun siyasa, gabanin zabukan cike gurbi, da za a gudanar a kananan hukumomin, Ghari/Tsanyawa da kuma Bagwai/ Shanono, a majalissar dokokin jihar.
Kwamishinan yan sandan jihar Kano, CP Ibrahim Adamu Bakori , ne ya jagoranci zaman tattaunawar da shugabannin jam’iyun da kuma yan takararsu, a shelkwatar rundunar dake unguwar Bompai Kano.
Za a gudanar da zaben a ranar Asabar 16 ga watan augustan 2025.
A zaman tattaunawar duka jam’iyun siyasar, sun rattaba hannu akan takaddar yarjejeniyar zaman lafiya, lokacin zaben da kuma bayansa.
- Ɗaurarru 16 Sun Gudu Daga Gidan Yarin Keffi
- Sojojin Sama Sun Yi Wa Yan Bindiga 400 Luguden Wuta A Zamfara
Kwamishinan yan sandan ya bada tabbacin cewa za a jibge isassun jami’an tsaro, kuma ya gargadi dukkan jam’iyun su yi yakin neman zabensu bisa dokar zabuka , don wanzar da zaman lafiya kamar yadda suka yi alkawari.
Sai dai ya ce duk wanda aka samu ya haifar da Rashin zaman lafiya doka zata yi aiki akansa ba tare da jin kunya ko tsoro ba.
A karshe ya yi fatan jam’iyun za su ba wa hukumomin tsaro hadin kai don ci gaba da samar da zaman lafiya mai dorewa yayin gudanar da zabukan dama bayansa.
Don sanar da yan sanda wani abu da ba a amince dashi ba, ko neman taimakon gaggawa a kira : 08032419754, 08123821575, 09029292926.